"Жүрекке жылы шақтарым"

https://www.facebook.com/100009210239593/videos/pcb.3886268198356816/1600811180794326

Білім беру саласының ардагері, ұлағатты ұстаз, білікті басшы, Бөрлі, Жәнібек аудандары, Орал қаласының құрметті азаматы, жаны жайсаң ағамыз Аскар Акишев Әшуұлының педагогикалық еңбек жолы туралы жазған (Жүрекке жылы шақтарым. Мектеп директорының жазбалары : «Не забыть мне эти школьные годы-Записи директора школы» /А.Ақышев.-Орал, «SophieStyle», 2024.-336 б., илл.) естеліктер жинағының тұсаукесері өтті.

Автор туралы осыған дейін мерзімдік баспасөзде жарық көрген ақжайықтық ақын-жазушылар мен жорналшылардың тартымды жазбалары да жинаққа енгізіліп, кітаптың мазмұнын байытып тұр. Шын мәнінде 4 бірдей білім ұясын 40 жылдай басқарған басшының педагогика саласындағы өмірлік тәжірибесі мен кәсіби шеберлігі бүгінгі мектеп директорларына таптыстырмас оқу құралы.

Естелік кітап «Алғашқы жолдама» деп аталатын тақырыппен басталады.

Ағамыз қазақ мектебін бітірсе де сол заманның үрдісіне қарай бірден орыс тілді ортаға түсіп, тарқатып айтсақ, педагогикалық қызметі Бөрлі ауданынан басталғанын тілге тиек етеді. Алдына биік мақсаттар қойып, соған жету жолында бойында күш-қайраты тасып тұрған алымды жас жігітке бұл жағдайлар еш кедергі бола алмағанын өмірдің өзі көрсетті. Бір көңіл бөлерлік нәрсе, сол дәуірдің тыныс-тіршілігін естеліктің өн бойынан сезіп отырасың.

Мәселен, сол уақыттағы қоғамдағы мұғалімнің мәртебесінің өте жоғары болғанын автордың мына үзіндісінен-ақ байқауға болады: «Тихоновка ауылындағы тұрғындардың 90 пайызы украин ұлтының өкілі. Оқушылар мен ата-аналар, мұғалімдермен бір жыл ішінде тіл табыстық. Көшеде кездесе қалсақ, «Здравствуйте, учитель!», деп сақалы беліне түскен аталардың қалпағын басынан жоғары көтеріп сәлемдескендері әлі есімде».

Жинақтың «Шәкірттерімді еңбекке қалай шыңдадым?», (15-19беттер) деп аталатын бөлігінде біздің бүгінгі кейіпкеріміздің бірте-бірте биіктерге ұмтылып, өсу жолына түскенін аңғарамыз: «1977 жылы оқушылар саны екі-үш есе үлкен орысша-қазақша Успен орта мектебіне директор болып ауыстым. Ұжыммен лезде тіл табысып, жұмысты бастап кеттім» деп жазады.

Асқар Әшуұлы аталған мектепте ұжым мүшелерімен арада болған әртүрлі жағдайларды күні кеше болған оқиғадай қылып, кітабында көркем сөзбен әдемі кестелеген. 2 мектепті 20 жылдай басқарған абыройлы басшы облыс орталығындағы басшылықтың көзіне түсіп, алғыр азаматтың Орал қаласына қызметке ауысқаны жинақтың «Сынаққа толы екі жыл», (20-22 беттер) бөлігінде жалғасады.

Асқар Әшуұлының қай жерде жүрсе де, қандай ұжымды басқарса да алдымен оқу орнының материалдық-техникалық базасына аса мән беріп, сол жолда сол замандағы түрлі кедергілерге қарамастан түпкі мақсатына жету жолындағы бір тыным таппайтын қажырлылығы мен табандылығы.

Сонымен бірге автордың тәрбие мен тәртіп мәселесінде жеткен жетістіктері кітаптың «Тентек мектеп» табысты мектепке қалай айналды?» (22-26 беттер), басшылық қызметтегі ұстанымдарын «Мен ұстанатын бес бағыт» (26-29 беттер), елімізде ұлттық сана-сезімнің ояна бастағанын айшықтайтын «Процесс пошел... (қазақ класы ашылғандағы қуаныш)» (30-34 беттер) бөліктерінде жан-жақты сараланады. Ал арнаулы мектепті басқарудың өзіне тән көптеген ерекшеліктері «Басқару әдісінің жаңа қыры» (35-40 беттер) және «Тыңда! Түсін! Көмектес!» (40-48 беттер) атты бөлімдерде жан-жақты баяндалады.

Өз ісіне өте мұқият басшы алдына қойған межеге жету жолында республикамызды былай қойып, Ресей мектептерін аяқтай аралап, олардың іс-тәжірибелері мен сала корифейлерінің ақыл-кеңестеріне жүгінгенін әсерлі суреттейді.

: Просмотров: 8

Бізге жазыңыздар